ruang.celoteh.0211

Selepas dari rumeh Fatime, muke Ahmad keliatan sedih.
Die kagak nyangke perjalanan cintanye bakalan serumit Romeo en Juliet. Selama perjalanan pulang Ahmad cuman
menggeleng-gelengkan kepale sambil beristighfar
ngebayangin kisah asmaranye ame Fatime bakalan kandas
lantaran masa lalu antara babe mereka berdue. Kadang
sesekali muke Ahmad senyum-senyum kalo ngebayangin
masa-masa indah menjalin cinte ame Fatime.

“Duh Fatime, ape abang sanggup ngelupain lo begitu aje? ,
masa sih kagak ade jalan laen untuk nyatuin kite? Maapin
abang ye, I love u Fatime” Ahmad bergumam kecil, kagak
sadar air matanye menetes pelan di pipinye. Jagoan silat
kite kali ini cume mampu menitikkan air mate atas
ketidakberdayaannye menghadapi babenye Fatime pake cara
nyang bener.

“Astagfirullahaladzim!” gumam Ahmad saat setan ngebisikin
untuk ambil jalan kawin lari. “Kagak, kagak kawin lari
cuman menambah masalah aje, gue gak bakalan mau ngambil
jalan pintas bodoh kayak gitu”

Cukup jauh Ahmad berjalan dan memang ia hanya mau berjalan
menuju rumehnye. Kagak lame kemudian hujan turun dengan
derasnye. Sosok Ahmad pun menghilang dalam lebatnye
hujan.

Nyang terdengar hanya suaranye menyenandungkan lagu dari
band kesayangannye

Ku ingin melukis kanvas jiwamu
Dengan rasa terdalam di hatiku
Menjadikan kau sebagai ombak
Yang takkan pernah jenuh kupandang

Untukmu yang pernah meluruhkan aku

Dalam waktu yang same dari kejauhan keliatan sosok
perempuan yang juga dirundung sedih, sape lagi kalo bukan
Fatime. Die lagi nangis sesegukan di dalam kamarnye. Die
kagak nyangke Babenye berbuat sekejem itu ke orang yang
amat sangat die sayangin. Dalam tangisnye Fatime juga
ngebayangin kalo perpisahan dengan Ahmad bakalan
bener-bener terjadi.

“Abaang jangan tinggalin Ime ye...” lirih suare Fatime
disambut rinai air mate nyang kagak kalah deres ame hujan
di luar kamarnye.

“I Love u abang” bisik Fatime sambil meluk bantal guling
kesayangannye sampe tertidur.

Dalam tidurnye Fatime sayup-sayup mendengar suare
kekasihnye tersayang bernyanyi namun dengan suare nyang
lirih.

Penglihatan di dalam hatiku
Telah tertuju mengapa kepadamu
Apakah harus aku yang terbakar
Menjadi abu tanpa kau tau

Wahai makna yang tak dapat kudalami

Kau yang selalu dalam impian
Yang takkan pernah kulupakan
Aku hanya ingin kau tau
Kupendam rasa hanya untukmu

Mendengar suare Bang Ahmad seketike dalam keadaan tidurnye
itu pule Fatime menitikkan air mate. Fatime teramat takut
kehilangan kekasihnye.

***

Udeh seminggu sejak kedatangan Ahmad ke rumah Fatime,
Enyaknye Fatime ngeliat ade perubahan dari diri anak
semate wayangnye. Nyang biasanye Fatime kalo dimasakin
sayur asem pasti nambah minimal dua piring, sekarang
boro-boro mo nambah, nyentuh tu sayur aje kagak. Sekarang
Fatime paling cuma makan nasi putih dua sendok makan ama
sambel secuil, minum aer putih trus die balik deh ke
kamarnye. Kalo ditanyain kok makannye cuman dikit? die
paling ngejawab dengan lemas “Aye lagi kagak napsu makan
Nyak”. Fatime pun nyang biasanye ceria dan murah senyum
sekarang udeh berubah jadi pendiem dan super duper jutek.

“Duuh anak Enyak, sampe kapan sih lo mo kayak gini
terus?” lirih Enyaknye Fatime sembari melintir-melintir
serbet nyang ade di meja makan.

“Ini kagak bole dibiarin lame-lame, Aye mesti ngambil
sikap, masa lalu adalah masa lalu dan masale Ahmad ame
Fatime kagak ada hubungannye ame perseteruan Babenye.”

Akhirnye Enyaknye Fatime sadar bahwa semue nyang terjadi
bise diperbaikin, setidaknye ade kesempatan untuk
ngembaliin anaknya kembali normal.

Dan ngejogroklah si Enyak di korsi bambu nungguin Babenye
Time. Kayaknya Enyak kagak maen-maen, tekadnye udeh bulet
mo ngebela anak semata wayangnye nyang jadi korban masa
lalu orang tue.

Di dalem kamar Fatime hanya bisa merengut. Yang bisa
menenangkan hatinye saat ini adalah meresapi ayat-ayat
Al-Quran sehabis die sholat sambil nangis dalam doa minta
jalan yang terbaik untuk hubungan cintenye dengan Ahmad.

Selain itu untuk menghibur diri dan mengusir sedih die
selalu ngebace novel kesayangannye berjudul “ Gemini dan
Kepingan Mimpi “ salah satu karye novelis terkenal dalem negeri nyang bername Ayu Prameswary.

“Mungkin klo aye punye kakak atawa sodare kembar kayak di
novel ini gak bakalan aye kesepian kayak gini.”

“Huh biasanye jam-jam segini pasti Bang Ahmad nelepon!
tapi udeh seminggu kok die gak ada kabarnye sih…? Baaang
aye kangen niih!”

Akhirnye untuk yang kesekian kalinye Fatime gak kuase
menahan tangis akibat teramat rindu pade Bang Ahmad. Kalo
udeh denger tangisannye Fatime, hati Enyaknye pasti perih
kayak diiris sembilu. Mane ada sih ibu nyang tega
ngebiarin anaknye sedih terus.

“Time anak Enyak sabar yeh neng, Enyak akan coba ngebujuk
Babe lo agar nerime Ahmad jadi anggota keluarge kite.”
lirih Enyak di teras saat mendengar tangisan Fatime, ia
hanye berani menatap kamar Fatime.

***

“Assalamualaikum!” Teriak Babenye Fatime.

Akhirnye waktu yang ditunggu-tunggu udeh tiba segera Enyak
nyamperin Babe Fatime, cium tangan trus balik ke dapur buat nyediain minum.

“Ni bang kopinye”

“Iye makasih”

Babenye Fatime kelihatannye udeh nyaman duduk di korsi
bambu, rokok kretek udeh diisep dengan nikmatnye. Enyaknye Fatime nunggu waktu yang pas buat ngomong masalah anaknye.
Tatapan matanye udah penuh dengan semangat dan sepertinye
die udah siap dengan konsekuensi yang terjadi nanti.

Setelah lima menit berlalu, satu batang rokok telah habis
terhisap dan kopi di dalam gelas sudah tinggal setengah
menemani Babe melepas lelah mulailah Enyak memulai
percakapan.

“Bang, Aye kesian ngeliat kondisi anak kite akhir-akhir
ini, die jadi berubah gak kayak Fatime yang biasanye.
Mukenye keliatan murung terus, kagak doyan makan lagih,
aye takut die sakit Bang liat aje badannye makin kurus.”

“Ah, ini pasti gare-gare anaknye si Jalum. Heran gue babe
ame anak sama-sama ngeselin! Coba kalo anak kite kagak
bergaul same Ahmad, Fatime pasti gak bakalan kayak gitu”
jawab Babe.

“Lho bang, itu berarti kan menandakan Fatime bener-bener
sayang ame Ahmad!”

“Aahh! Gue kagak percaye, anak kite kan cakep, pinter,
masa bisa kecantol ame anak kampung macem si Ahmad!
anaknye Jalum lagi, bikin panas hati aje, gak mungkin”

“Nah kalo abang ngerasa anak kite pinter kenape gak
ngerestuin orang yang udeh jadi pilihannye? Pastinye
Fatime gak sembarangan pilih dong? Die pasti milih dan
menimbang-nimbang kalo mo serius sama seseorang ye kan?”

“Fatime pasti salah pilih Ti, emang sih Ahmad keliatannye
orangnye bae dan jujur, keliatan dari mukenye. Tapi tetep
aje gue kagak sudi”

“Bang, kok Abang jadi kejem amat sih? Abang pan tau anak
kite si Fatimeh udeh cinte bener ame si Ahmad”

“Lu diem aje deh, bukanye aye kejem, tapi aye kagak sudi
kalo kudu besanan ame si Jalum”

“Masyaallah si Abang, haree gini masih aje nyimpen dendam
ame si Jalum, eh Bang denger ye, ntu cume masa lalu ngapain sih Abang ungkit-ungkit”

“Lu denger ye Ti, ini emang cerite mase lalu kite, tapi
jujur aje aye masih gedek ama tu manusia”

“Istighfar Bang ... Istighfar ..... pan Abang tau, dendam
ame orang ntu kagak bae, dose Bang hukumnye. Lagian ye
Bang si Fatimeh ame Ahmad kagak ada sangkut pautnye ame
masalah masa lalu kite, mereka dah pade saling cinte Bang
dan kite juga dose klo sebagai orang tua kagak ngerestuin
niat baik anak kite”

“Justru itu Ti, gue pingin tu si Ahmad tau kelakuan
Babenye dulu, gimane culasnye si Jalum dan biar Fatimeh
juga tau kalo calon mertuanye dulunye ntu kagak bener,
suka main curang!”

“Abang apa-apain sih?! Kagak lucu Bang!”

“Emang kagak lucu Ti, gue kagak lagi ngelawak”

“Aye ingetin ame Abang sekali lagi, aye kagak demen Abang
kayak gini. Kite dah tue Bang, kagak bae nyimpen rase
benci ame orang lain, lagian pan Akhirnya Aye jadi milik
Abang, akhirnye aye milih Abang karena cume Abang yang aye
cinte”

“Gue tau Ti, tapi gue tetep kagak demen ame tu bocah
keturunan si Jalum”

“Abang keras kepala, Abang egois kagak mikirin perasaan
Fatimeh, Abang tau kagak kalo malem aye suka denger
Fatimeh nangis di kamarnye, aye kagak tega Bang. Cuma
gara-gara rasa benci Abang, Abang tega nyakitin perasaan
anak Abang sendiri. Kite cume punye Fatimeh Bang, aye pingin liat die seneng hidup ame laki-laki demenannye”

“Iye ... tapi kagak mesti ame si anaknya Jalum. Pan masih
ade si Juki, die juga cinte ame si Fatimeh die juga
anaknye haji lagi dan gue rase Fatimeh pasti hidup seneng
ame si Juki”

“Tapi Abang sadar kagak sih ?! Klo fatimeh cume cinte ama
si Ahmad, bukan si Juki yang orangnye suka begantung ame
orang tue”

“Pokoknya gue kagak setuju kalo Fatimah kawin ama si Ahmad
... titik !! kagak boleh di bantah lagi!”

“Ok .. kalo Abang maunye gitu, Abang egois, kagak sayang
ame anak sendiri. Bang .. denger ye ! Mulai ni malem kite
pisah ranjang dan besok aye mo pegi aje ke rumah Emak aye
dan aye bakal ngajak Fatimeh. Silakan Abang mo dendam ame
si Jalum ampe kapan .. ntu terserah Abang !”

“kok lu gitu Ti?!”

“bodo!”

Di Rumeh Haji Samsul (Bokapnye si Juki) —

“Boooooos!, Bos Jukiiiiii!” Si Japra anak buahnye Juki kelihatan lari tergopoh-gopoh kayak orang abis ngeliat setan. Kontan seisi rumah pade melengos ke arah si Japra.
Hari ini kebetulan Haji Samsul ame Enyaknye si Juki kagak ade di rumeh. Nyang ade cuman Juki, Kubil (tangan kanannye Juki), dan Ismail ade kandung si Juki.

“hhh hah hh hah hh!” Japra keliatan ngap-ngapan, mukenye rada pucet, mungkin kekurangan oksigen. Tangannya sebentar megangin dada, sebentar ngusep keringet di kepala.

Secepet kilat Juki ame Kubil keluar nyamperin tu anak. “Ngape lo Pra, tumben lari-larian gak jelas gituh?” Tanye Juki penasaran.

Si Juki ni anak Betawi aseli nyang kehidupannye bikin anak-anak kampung Betawi manapun ngiri. Gimane gak ngiri mulain brojol ke dunie ampe sekarang hidupnye kagak perne suseh, mo makan tersedie, waktu ke sekole dulu gak perlu kepanasan abisnye pan die dianter jemput ame sopir babenye pake mobil ber-ac. Mo tipi gede, leptop paling canggih, motor keluaran terbaru, henpon nyang paling kinclong tinggal tunjuk. Babe ame Enyaknye bener-bener manjain die banget. Apalagi sekarang, disaat anak2 kuliah nyang baru lulus kesono kemari ngirim lamaran kerje, die mah enak aje tinggal ngejogrok di perusahaan Babenye. Mo berangkat ngantor ape kagak, seenak jidatnye aje dah. Ngiri kan lo?.

(Wokeh balik lagi ke Japra ^_^.)

“Boos… aye punye berita penting nih, Babenya Fatime ngundang si Ahmad ke rumehnye tuuh. Bisa gawat ni bos kalo ampe babenye Time ngaminin hubungan anaknye ame si Ahmad!” si Japra ngejelasin sambil nunduk megangin lutut layaknye orang nyang lagi ruku’, rupanye si Japra masih puyeng gara-gara lari-larian di siang bolong.

“Hah! Nyang bener lo Pra?, waduh setau gue dari kemaren-kemaren kan Babenye Timeh kaga sudi ketemu ame si Ahmad. Ade ape yeh? Perasaan gue jadi kagak enak nih, jangan-jangan Babenye mulain demen ame si Ahmad. Wah ini kagak bisa dibiarin!”.

Juki jalan mondar-mandir, jidatnye semakin berkeriput, sesekali die garuk-garuk kepala padahal palanye kagak gatel. Kelihatannye Juki lagi berpikir keras gimane caranye supaye Ahmad kagak berhasil nemuin Babenye Fatime.

“Kapan tuh si Ahmad disuruh nemuin Babenye Time?” Tanye Juki ke Japra
“Malem minggu ini bos, ntu berarti besok malem kan?” Jawab Japra dengan nafas yang sudah stabil.

“Naah! Gue punye ide nih. Eh Kubil! kali ini gue butuh bantuan lo. Lo kan jawara kampung sini, pastinye jurus-jurus silat lo kagak bise diremehin. Sebagai tangan kanan gue, lo musti bantuin gue untuk ngalangin si Ahmad nginjek rumehnye Fatime apapun caranye” seru si Juki sembari memperlihatkan senyum liciknye ke Kubil.

“Kalo aye sih mo ade sepuluh Ahmad kagak masaleh, nyang penting ininye Bos” sahut Kubil sambil gesekin jari telunjuk sama jempolnye jadi atu.

“Halaah itu mah keciil! Yang penting kerjaan lo beres dulu. Masa lo lupe gue siape? Nih si Juki anak betawi nyang paling kaya”. Si Juki mulain lupe diri.

“Kalo gitu hayo kite ke dalem nyusun rencana buat besok malem”. Juki dan anak buahnye akhirnye masuk lagi ke dalem rumeh.

Dari kejauhan Ismail, ade kandungnye si Juki mencium bau busuk rencane Abangnye untuk nyelakain si Ahmad.

“Ini gak bole ampe terjadi” dalem ati Mail bergumam. Diem-diem si Ismail masuk ke kamarnye nelpon si Ahmad untuk berhati-hati malem minggu nanti. Secara singkat Ismail menceritakan rencana kakaknye ke Ahmad.

Ismail, selain emang die dasarnye anak nyang baek, die juga adalah adik seperguruan Ahmad di perguruan silatnye Abah Fuad.

Selesai Mail ngomong ame si Ahmad, tiba-tiba bogem mentah Juki nyasar ke pipinye.
“Plakk!”. “Dasar ade kagak tau diri lo! Ngapain juga lo malah belain si Ahmad? Harusnye kan lo belain gue, abang lo sendiri?” Mail kagak sadar ternyata pembicaraanye sama Ahmad melalui telepon ketahuan .

“An***g lo!, dasar go***k!, bogem kedua dilemparkan lagi ke muke Mail, tapi kali ini Mail berhasil menangkis dan balik mendorong badan Juki.

“Eh dengar ye Juk, kalo lo emang jantan, harusnye lo kagak perlu ampe punye rencana nyelakain orang. Kalo lo demen ame Fatime, harusnye lo datengin rumahnye terus lo lamar deh tu Fatime buat lo jadiin bini!. Malu gue punya abang katro kayak lo, bisanye cuman ngandelin orang aje. Tunjukin dong kemampuan lo sendiri!” Ismail buru-buru beranjak pergi dari rumeh. Die khawatir malah jadi berantem ame Abangnye sendiri.

“Dasar ade sialan!” Juki memaki sambil berdiri dari jatohnye akibat didorong Mail tadi.

* * *

Malem minggu (Hari H Ahmad ketemu calon mertue)—–

Ahmad lagi berdiri berhadepan ame cermin di kamarnye, tangannye sibuk merapikan kerah baju kemeja warna birunye. Malem ini si Ahmad bener-bener kelihatan gagah. Selesai dengan penampilan, die buka lemari ngambil dompet ame jam tangan.

“Sholat Isya udeh, penampilan oke, dompet siap, henpon di kantong, sekarang tinggal pamit minta doa restu ame Nyak Babe” batin Ahmad.

Begitu Ahmad keluar dari kamar, Enyak, Babe dan Ade-adenye pademelongok ngeliatin penampilan Ahmad. Mereka kagak nyangka Ahmad bise sekeren itu.

“MasyaAllah, lu Ahmad pan, anak Enyak?” Enyaknye Ahmad rupanye pangling ame anaknye sendiri.

Maklum selama ini Ahmad penampilannye sederhana banget, kagak pernah dandan. Penampilannye nyang penting rapih, bersih, dan nutup aurat itu dah cukup katenye.

“Astagfirullah, Nyak mase kagak kenal ame aye? Kan Emak nyang ngelahirin aye.”

“Iye Mad, hari ini penampilan lo kagak seperti biasanye, lo keren banget mirip artis sinetron di tipi-tipi”. Sahut Babe si Ahmad sambil kipasan pake kipas yang terbuat dari kulit bambu.

“Ah Babe bise aje”

“Lagian lo mo kemane sih Mad?” Tanya Enyaknye lagi

“Ini Nyak, Beh, aye mo menuhin undangannye Babenye si Fatime, Babenye Fatime mo ngobrol-ngobrol gitu deh, aye minta doanye yeh Nyak, Beh” ujar Ahmad.

“Oh, iye dah, ati-ati ye di jalan. Nih Babe kasih duit buat pegangan.” Babe ngorek-ngorek isi peci itemnye.

“Mmm kagak useh Beh makasih, aye dah ada kok, Babe tenang aje hehehe” Ahmad langsung menyambar tangan Babe ama Enyaknye untuk dicium.

“Aye berangkat dulu ye, Assalamu’alaikum!”

“Wa’alaikum salam!” keluarganye Ahmad nyaut salam kompakan.

* * *

“Hop! oop, berenti di sini aje bang pinggir dikit dah tuhh deket tukang martabak”. Kate Ahmad ke tukang ojek.

“Ngiiiik”. Motor ojek mendarat tepat di depan tukang martabak. Ahmad langsung ngasih ongkosnye, “Nih bang ambil aje kembaliannye”.

“Wii alhamdulilee, makasih ye Bang, mudah-mudahan Abang rejekinye makin banyak dan selamet dunie akherat!” Tukang ojek kegirangan dikasih duit gocapan ame si Ahmad.

“Amiiiin, sama-sama makasih ye Bang ude nganterin aye dengan selamat hehehe”. Ntu Tukang ojek pun langsung ngacir sambil cengar-cengir.

Selesai beli martabak telor super spesial, Ahmad jalan kaki menuju ke rumeh pujaan hatinye. Jarak rumeh Fatimeh gak begitu jauh dari tempat die beli martabak. Tiga menit jalan santai juga udeh sampe.

“Lha, ni jalanan kok sepi banget yak? Padahal baru jam Lapan, ud pade molor kali yak? Et daah malem minggu malah pade molor, payah ni orang-orang kampung”. Ahmad ngomong sendirian sambil ngeliatin jam tangannye.

“HEI BRENTI LU!” tiba-tiba ada suara yang bikin kaget si Ahmad. Rupanya ada orang yang nyegat Ahmad sambil ngacungin goloknye.

Ni orang kostumnye mirip-mirip ninja cuman bedanya penutup kepalanye pake sarung, yah kite sebut aje ni sosok -Ninja sarung- yeh ^_^.

“Astagfirullah, iye bang aye brenti nih, cuman jangan ngunjukin golok ntu ke aye donk bang, ngerii, tar klo setan lewat gimane bang? Ah ngeri dah pokoknye”. Ahmad masih belon sadar tu ninja sarung mo nyelakain die.

“Ahh diem loh kagak usah banyak bacot!. Mo kemane loh hah?!” Ninja sarung keliatan makin garang.

“Oh ini aye mo silaturahmi ke tempat sodare bang, rumenye kagak jauh kok dari sini, ade ape ye bang kok sampe perhatian gitu ame aye?, kagak usah dianterin juge kagak ape-ape kok bang, aye tau kok jalannye, yah paling tinggal dua tikungan lagi nih” Ahmad menjawab dengan tenang sambil senyum-senyum simpul.

Ninja sarung malahan kesel karena Ahmad bukan takut malah kesannye ngeledek.

“Heh anak sialan, mendingan lo pulang deh, ato ni golok nancep di jidat lo!” Ninja sarung mulai mengancam.

Tiba-tiba Ahmad inget obrolannye tempo hari liwat henpon ame Ismail ade seperguruannye.

“Jangan-jangan ini yang dimaksud Mail kemaren siang. Tapi kalo gue nirutin maonye tu Ninja, hubungan gue ame Fatime bisa punah nih. Wah kayaknye kagak ada jalan laen selaen bertarung nih”. Ahmad membatin.

Ditarolah bungkusan martabak telor super spesial nyang masih anget di tempat yang aman, kemudian Ahmad angkat bicara.

“Bang, aye minta maap sebelumnye, tujuan aye ke kampung sini bukan untuk berbuat jahat, aye cuma mo silaturahmi ke tempat sodare aye. Jadi mohon abang ngasih aye liwat”.

“Ahhh banyak bacot lu, nih makan golok gua, Ciaaatttt !!!” Ninja sarung memulai perkelahian dengan langsung meyabetkan goloknya ke arah kepala Ahmad.

Ahmad langsung pasang kuda-kuda begitu lawannya mo nyerang. Dengan cepet die nunduk untuk menghindari golok nyang diarahin ke kepalanye.

Ahmad gak kalah jurus, walaupun lawannye bersenjatakan golok, die kagak gentar, dengan gerakan secepat kilat Ahmad ngeluarin jurus sapuan kakinye ke tu Ninja.

Sreet!” sapuan kaki Ahmad mengalir dengan sempurna ke kaki lawan. Dan “Bruuk!” Ninja sarung langsung jatoh terjerembab. Ngeliat lawan udeh jatoh Ahmad gak menyia-nyiakan kesempatan nyang ade. Die langsung tendang golok nyang dipegang lawan, “Prak!” dan berhasil. Goloknya sudah gak ada dalem kekuasaan tu Ninja.

Menyusul jurus penutup, Ahmad mengarahkan kepalan tangannye ke arah dada tu Ninja
nyang masih terkapar “Buuk!.”

“Hugh!” Sang Ninja terlihat kesakitan dan sesak nafas dihadiahi pukulan terakhir Ahmad.

“Sekarang saatnye!” ujar Ahmad dalem hati.

Segera Ahmad ngambil bungkusan martabaknye, dan lari sekenceng-kencengnye ninggalin Ninja sarung yang lagi kesakitan menuju ke rumeh Fatime.

“Ugh Ahmad, rupanye lo tangguh juge yeh!” kata Ninja sarung yang masih megang-megang dadanye, sembari ngeliatin Ahmad nyang ude jauh ngambil jurus langkah seribu alias ngabur.

“Pertarungan kite belom selesai, kite liat aje nanti, gue pasti bakalan nemuin lo, dan bikin lo mati !” Ninja sarung seolah gak terima akan kekalahan nyang die derite.

* * *

“Hh hah hh hah hhhhh” Ahmad nyoba ngatur nafasnye, sekarang die ude tiba di depan rumeh Fatime.

“Gila, hari gini masih ada aje orang yang jadi Ninja-ninjaan. Untung gue bisa lolos” ujar Ahmat sembari ngerapiin baju dan rambutnye.

“Huuff, kali ini gue bakalan nemuin pertarungan yang sebenarnya, yaitu berhadapan ame Babenye Fatime. Mudah-mudahan gak terjadi hal-hal nyang buruk ame gue nanti.”

“Ya Allah, tolonglah hamba-Mu ini. Bismillahirohmanirohiiim.”Ahmad nyoba ngumpulin keberanian. Dengan mantep masup pekarangan menuju pintu depan rumahnye Fatime.

“Assalamu’alaikuuum !” seru Ahmad mantap.

“Wa’alaikumsalaam !” akhirnye kuping aye dengar suara merdu Fatimeh ngejawab salam.

Sore ini aye ketemuan lagi ame Fatimeh ngajak die nonton lenong di kampung Setu, sekalian aye juga pingin cerite ke die tentang kekhawatiranye selama ini.

“Neng, … neng gak tau kan, sebenernye abang tuh gak nganggur?” duh akhirnye aye buka rahasia lebih awal dah.


“Jangankan Neng, Babenye Abang aje kagak tau kalo sebenernye aye punye penghasilan.” Ya .. aye kerja di mane selama ini emang kagak ada satu orangpun nyang tau, cume aye ma Allah nyang tau.

“Yang bener bang?” tanye Fatimeh penasaran

“Jadi Abang bukan pengangguran dong?, trus Abang emangnye selama ini kerja di mane? Kok aye gak pernah di kasih tau sih ma Abang.” Duh … begini ini neh Fatimeh, kalo dah nanye berentet banyak bener, dah kayak wartawan aje.

“Sabar dong Fatimeh sayang, atu-atu nanyanye, Abang jadi bingung nih jawabnye nyang mane dulu?”

“Iye Bang maap, abis Abang sich bikin Neng penasaran,” mukenye Fatimeh jadi merah, lantaran die malu sedari tadi nyerocos mulu.

“Begini Neng, sejak lulus SMA Abang ikutan perkumpulan, namenye TANJIDOR UNITED.”

“Tanjidor United Bang? apaan lagi tuh?” Tanyanye penasaran, duh … klo Fatimeh lagi nanye sambil melongo gini, bikin aye jadi gemes aje.

“Aduuh Neng, penasaran sih penasaran tapi jangan sambil narik-narik kumis donk kan perih!” begini ini kebiasanye si Fatimeh, dari dulu ampe sekarang klo gemes ame aye … pasti kumis tipis aye nyang jadi sasaran.

“Maaapp Bang, abisnye kumis Abang lucu sich … hihihi.” Fatimeh selalu bilang kalo kumis aye ini lucu , aye juga bingung, ngapa ni kumis dari dulu ampe sekarang segini-gini aje ye, padahal aye pingin juga kumis aye tumbuh lebat kayak Abah Fuad, pan keren tuh keliatanye, kayak jawara hehheh…

“Gini Neng, semuanye berawal dari Abah Fuad nyang guru silat di kampung seberang. Sekitar 8 taon nyang lalu Abang udeh belajar silat ame Abah Fuad. Waktu ntu abang baru lulus SMA terus dua taon setelah Abang berguru ame beliau, Abang diberi kepercayaan jadi assisten di perguruan silatnye, Nah mulai dari situ Abah Fuad tiap bulan ngasih Abang uang saku”. Aye coba ngejelasin pelan-pelan ke fatimeh, ya .. maklum aje si Fatimeh ntu kadang suka tulalit, tapi cuma dikit, aslinye mah die gadis nyang cerdas, mangkenye aye cinte mentok ame die.

“Truss hubungannye ame Tanjidor United apaan Bang?” tuh .. kebuktikan kalo die gadis nyang cerdas, klo nanye aje kudu ampe detail begini.

“Ya elah sih neng kaga sabaran amat sih orangnye, ini pan lagi diceritain, jangan dipotong dulu nape,” Duh .. aye jadi gemes pingin nyubit pipinye Fatimeh, tapi jangan dah kesian, aye toel aja dah dikit.

“Iya Bang Ahmad sayaaang, maapin Neng ye .. lanjut dah Bang ceritanye!”

“Nah selain punye perguruan silat, Abah Fuad ntu juga punye group lenong namenye grup SINAR BETAWI. Di grup lenong ntu kan diiringin musik, nah Abang tuh juga ditunjuk buat niup tanjidor. Temen-temen SINAR BETAWI nyebut semua pemain musiknye ntuh TANJIDOR UNITED. Di situ pun Abang dapet duit, jadi penghasilannye dobel Neng.” Napas aye jadi ngap-ngapan lantaran cerita panjang lebar begini.

“Ooo gitu Bang!, aye seneng deh Bang dengernye, ternyate Abang bukan tipe laki-laki nyang jadi benalu di keluarga Abang,” Fatimeh tersenyum bangga ke aye, sampe-sempe bikin aye ke GeEran.

“Selama ini Neng, Abang tuh udeh nabung, yah lumayanlah cukup buat biaya ngelamar Neng dan juga buat biaya hidup kite berdua sehari-hari. Dan nyang bikin Abang makin yakin buat ngelamar Neng adalah karena kemaren Alhamdulillah Abang diterime kerje jadi guru agama di Yayasan Raudlatul Jannah.”

“Oo .. Yayasan nyang deket kelurahan ntu Bang?.” Tanye Fatimeh buat memastikan

“Iye, tapi di TPA-nye Neng, ya doain aja moga-moga ntar Abang bisa juga ngajar di Madrasahnye.”

“Duuh bangganye aye denger Bang Ahmad tercinte pinter nyari penghasilan. kagak sie-sie selama ini aye setia ame Abang” sangking bangganye ke aye, nyaris aje si Fatimeh mo meluk aye, untungnye die langsuung inget kalo kita belum jadi muhrim, padahal aye dah mo nanggepin pelukanye Fatimeh, hehehh ..

“Oh iye Neng, hari ini Abang gak nganter sampe masuk rumah ye, Abang agak buru-buru, Abang ada janji ame Abah Fuad. Ini dah telat 5 menit, gawat nih klo ampe Abah marah tar Abang di kepret pecinye lagi.”

“Iyeeee Abang ganteng, kagak ape-ape kok, aye ngarti Bang lagian rumeh aye pan dah gak jauh tuh. Ntar aye jalan sendiri aje deh.” Ah … Fatimeh emang tipe cewek idaman, die selalu bise ngertiin aye.