ruang.celoteh.0211

Pagi-pagi bener bini gue si Siti dah rapi. Semaleman die manyun aje ke gue, gue di tinggalin sendiri di kamar. Aah.... ini semue gare-gare anak gue Fatimah yang naksir ame si Ahmad anaknya si Jalum musuh bebuyutan gue.

“Ti ... lu serius mau pegi ke tempat Emak lu?” gue coba ngerayu bini gue, yang pagi ini masih tetep manyun.

“Iye ... !! si Fatimah juga aye ajak, aye kagak tega Bang liat Fatimah mewek mulu semaleman, sapa tau ntar di rumah Nyak tuanye die ngerasa kehibur.” Masyaallah tumben bener logat ngomongnye si Siti ketus amat ke gue.

Terus terang aje gue jadi bingung, Siti ntu bini gue nyang paling baek, die orangnye sabar bener jarang banget marah ma gue. Tapi neh pagi, die bener-bener berubah kagak bisa di rayu lagi. Padahal biasenye kalo die ngambek trus mo kabur ke rumah Emaknye, gue rayu dikit juga langsung kelepek-kelepek trus kagak jadi deh die pegi.

***

Dah masuk tiga hari ini bini gue ma anak kesayangan gue pegi dari rumah. Ya ampun dah, gue bener-bener dah kayak orang dungu di rumah sendirian, kagak ada nyang bikinin sarapan, kagak ada nyang bikinin gue kupi, kagak ada nyang ngurusin gue.

Fatime .. pulang nape Neng, badan Babe pegel-pegel kangen pingin di pijit ame lu. Siti … yayangnye gue, lu ngapa jadi begini sih, pegi ninggalin gue. Ape emang gue nyang egois ye ?, tapi ini semua gue lakuin buat kepentingan anak gue juga, gue kagak mau kalo nanti idupnye fatimeh keblangsak gara-gara die kawin ma Ahmad, anaknya musuh bebuyutan gue.

“Assalamualaikum … Assalamualaikum .. .“ Duh .. siape si, ganggu orang lagi ngelamun aje. Gak tau ape tu orang kalo gue lagih sedih.

“Iye …. Bentar .. !! etdah kagak sabaran bener nih orang.” Masyaallah .. gue baru nyadar kalo rumah berantakan bener, mana ade tamu lagi, biarin dah ah .. belaga cuek aje.

“Waalaikumsalam … .“ Eh .. buset deh, Astagfirullah .. si Jalum nyang dateng, mo ngapain die kemari?

Tiba-tiba aje kepala gue jadi semaput, mau ngapain si Jalum kerumah gue ? mau ngajakin rebut ape die. Cemen banget si Ahmad, pake ngadu-ngadu ke Babenye. Tapi tenang, gue kudu jaim di depan si Jalum, gue kagak boleh gegabah.

“Maaf, Sien kalau kedatengan gue bikin lo kaget. Gue cuma mau silaturahmi aje ma lu.” Rese banget da ah, ternyata si Jalum tau kalau gue kaget liat die. *tarik napaaasss … buang pelan-pelan (ajaranya fatimah nih, katanye kalo pingin tenang cara paling gampang ya begini ini).

“Duduk di bale luar aje ye, di dalem panas.” Huh .. pantang bagi gue, nagajak si Jalum masuk ke dalem rumeh gue.

“Iye dah … di luar aje biar adem”


Haduuhh .. kenape juga ni manusia dateng saat gue lagi begini, saat gue lagi sedih. Pada tau sendiri dah, gue kalo lagi sedih kagak bisa ngontrol emosi. Bisa-bisa si Jalum kena bogem gue nih. “Astagfirullah ..”

“Rumah lu sepi amat Sien, bini ama anak lu pade kemane?” tampang si Jalum celingak-celinguk nyariin bini gue. Kurang ajar !

“Lagi pada belanja ke pasar.” Tuh kan .. gue jadi bo’ong dah, ya abis mo gimana lagi, masa gue bilang bini ama anak gue kabur pan kagak lucu, bias-bisa si Jalum ngetawin gue.

Semenit .. duamenit gue ama Jalum cuma diem-dieman aje, bingung gue mau ngomong ape ma die, jangankan ngomong, liat tampangnye aje dah males banget. Sambil nunggu die duluan nyang ngomong gue sibuk nyundut rokok buet gue.

“Bagini Sien, maksud kedatengan gue kesini baek, bukanye gue mau ngajak lu ribut kayak dulu. Eh ..iye Sien soal nyang dulu gue bener-bener minta maap ye, gue ngaku salah dan sekali lagi gue ucapin selamet ye karena elu dah berhasil ngegaet hatinye Siti.” Hhahahhaha … akhirnya dia ngaku salah juga ke gue. Bagus dah.

“Trus … lu mau ape kesini ?!”

“Oke .. Sien, lu pasti dah tau pan kalo si Ahmad ntu anak gue, dan elu juga pasti udah tau kalau anak gue Ahmad cinte ama anak lu yang cantik ntu si Fatimah. Husien .. maap banget sebelumnye, bukanye gue mao ngeguruin elu, tapi udah dah Sien, lu kagak usah hubung-hubungin musuhan kita nyang jaman dulu ama masalah cinte anak-anak kite.” Tampang si Jalum mendadak pucet, die pasti dah ketakutan kalo gue bakal ngamuk. Dari dulu si Jalum dah tau watak gue. Senggol bacok! .. *wakakkaka .. garang gak tuh ?.

“Trus …?!”

“Ya .. gue minta lu bisa ngertiin ini. Gue harap lu bisa ngerestuin hubungan mereka” tampang Jalum makin pucet, kakinya masang kuda-kuda buat siap-siap kabur, takut kalau tiba-tiba gue kalap.

“Tengil banget laga lu !. emang anak lu punya ape ? berani-beraninya ngelamar anak gadis gue!” Masyaallah .. gue jadi nyombong dah.

“Maaf Sien .. gue gak maksud tengil didepan lu, tapi coba lu pikirin lagi masalah ini. Ya udah ye Sien, gue balik dulu” tanpa di komando dan di usir, Jalum langsung pamit pulang. Payah banget tu orang!.

*****

Sekarang dah masuk hari ke lima, bini ama anak gue pegi dari rumah. Neh … malem sepi banget mane di luar gerimisnye awet bener. Duh … gue kesepian dirumah sendirian. Perut gue laper, baru di tinggal lima hari berat badan gue dah turun, apalagi kalo di tinggal sebulan. Bisa kurus kering gue.

Rumah juga dah kayak kandang orang, berantakan gak keurusan. Debu pada nempel di mane-mane, sepre di kamar gue aut-autan, gue bener-bener kesepian kagak ada Siti ma Timeh. Kerjaan gue tiap hari jadinya cuma bengong aja, mundar-mandir kagak jelas.

Di sini … bawah pu’un sengon ini tempat paporit gue, ini pu’un warisan engkong gue, biasenye gue sering duduk disini ame Siti sambil ngobrol, kadang-kadang sambil becanda.

Dah abis lima batang rokok yang gue isep, tapi Siti ma Timeh lom juga balik. Rokok keenem gue sundut lagi, gue isep sambil nginget omonganye si Jalum dan si Siti bini gue. Ape emang gue terlalu egois ye?. Bener juga sih yang di bilang si Jalum, dan emang ada benernye juga yang di bilang bini gue. Tapi gimane dong, gue masih empet bener ama si Jalum.

Sebatang demi sebatang, akhirnya abis juga rokok gue sebungkus (gile kuat bener ngerokoknye). Oke dah, besok gue bakal kerumah Nyak tuanye si Timeh, gue mau ngejemput Fatimah ama bini gue. Gue kagak tahan idup sendirian begini.

*****

“Fatimah … anaknya Babe nyang paling cakep, nyang paling manis, nyang paling soleh. Babe minta maap ye, Babe dah nyakitin perasaan lu.” Duh ,,, gue jadi pingin nangis.

“Siti … bini Abang nyang paling cantik, nyang paling baek, maapin Abang juga ye, Abang udah egois kagak mau dengerin masukan dari elu” yaeeelaahh .. gue ngapa jadi mellow gini yak. Dah kayak vokalisnya band NIWA aje… suka mellow-melow gak jelas gitu .. hehhehe.

Dengan semilyar rasa sayang nyang gue punya, gue peluk erat dah tu anak ma bini gue. Sementara ntu Nyak tua cengar-cengir aje mamerin gusinye.

“Jadi … Babe setuju kalau Fatimeh kawin ame Bang Ahmad?”

“Iye … Neng, Babe setuju. Tapi Babe punya atu persyaratan buat si Ahmad, dan die kudu menuhin pesyaratan dari Babe. Kagak boleh kagak, kudu, harus, mesti, wajib dia laksanain!” Sebagai orang tua nyang baik, gue pingin tau seberapa pengetahuan calon mantu gue tentang agama.

“Persyaratan apa lagi Be?” Muka Fatimeh keliatan tegang, sementara bini gue sibuk ngelus-ngelus punggung Fatimeh. Biar rada tenang gitu.

“Ada deh … lo suruh aja si Ahmad dateng kerumah. Dan ntar biar Babe jelasin apa peryaratannye”


******


Malam ini rencananye si Ahmad bakal nemuin gue lagi, dan malam ini gue bakal ngajuin satu persyaratan ke die.

“Be … persyaratan ape yang kudu aye penuhin supaya aye bisa meminang anak Babe.” Ngeliat tampang si Ahmad gue jadi inget Jalum. Duh … masih aja gue kesel ma die. Asttagfirullah

“Begini Mad, cuma atu persyaratanya, elu kudu khatam qur’an di depan gue” spontan aje Fatimah, Siti ama Ahmad kaget denger pensyaratan yang gue kasih. kata orang dulu mah. klo die dah bise ataw dah sering hatam Alquran, Insya Allah Syarat-syarat untuk menjadi Imam untuk keluarganye udeh bise dah. Makanya gue pingin tau semana kemampuanya si Ahmad.


“Abang yang bener aje, kudu khatam quran di depan Abang, pan banyak banget Bang, bisa pegel mulut anak orang” muka Fatimah ikutan tegang tapi si Ahmad tiba-tiba jadi keliatan lebih santai.

“Baik Be, aye bakal khatamin Qur’an di depan Babe sekarang.” Buseett .. ni bocah nyalinye gede juga, dia berani nerima tantangan gue.

Fatimah buru-buru masuk ke dapur ngambil air putih bakal si Ahmad. Sementara Siti bini gue duduk dengan harap-harap cemas di samping gue * loh ..kok jadi bini gue sih yang H2C

Bissamillahirahmanirohim …. Setelah itu Ahmad membaca surat Al-Ikhlas sebanyak tiga kali.

“Udah Be, aye dah ngekhatamin Al-quran”

“Khatam ? gimana ceritanye, elu Cuma baca surat Al-Ikhlas tiga kali doang” gue merasa di permainkan ama si Ahmad.

“Jadi begini Be, aye inget ama kisah pada jaman Rasullah dulu. Waktu para sahabat mau meminang anaknya Rosul syaratnya juga sama. Dan akhirnya persyaratan tersebut bisa di penuhi oleh Sayyidina Abu Bakar (kalo ga salah) yaitu hanya dengan membaca tiga kali surat Al-ikhlas. Karena Rosul pernah bersabda Al-ikhlas itu 1/3 nya AlQuran dan artinye klo bacanya tiga kali berarti sama saja kita sudah khatam Alquran. Tapi ini bukan berarti kita senaknya tiap hari cuma kudu baca surat Al-Ikhlas aja, terus kagak baca Quran.”

“Ooo .. jadi begitu, bener juga kata si Ahmad Bang, dari pada die makan waktu baca qur’an ampe kelar di rumah kite, mending die ngikutin jejak sahabatnya Rasul kite. Lagian kalo si Ahmad ngekhatamin quran seharian dirumah kite ntar tugas dan kewajiban die di luar jadi terlantar.” Bini gue ikutan nimbrung ngomong. Tapi emang iya juga sih.

“Jadi begitu Be, buat ape juga aye khatam Quran sekarang, tapi aye gak tau makna dan isinya”

Buset … ternyata pengetahuan agama si Ahmad lumayan juga, emang bener apa kata dia, buat apa bulak-balik khatam Quran tapi gak paham ama isinya, sama aja boong. Fatimah .. Fatimah emang kagak salah lu milih calon laki, pantesan lu ngebet banget pingin di kawinin ama Ahmad.

“Ahmad … Babe salut ame lu, lu emang pemuda yang bisa di andelin, lu kagak sombong juga kagak banyak tingkah. Bulan depan lo dateng lagi deh kemari, bawa Nyak ame Babe lu ye!” Tampang si Ahmad langsung seger, udah kayak kembang yang kena ujan. Fatimah pun keliatan malu-malu tapi mau.

“Alhamdulillah … “ Bisik Bini gue ….lirih.

Akhirnye hari nyang aye tunggu-tunggu dateng juga. Ba’da Isya nanti Bang Ahmad bakal dateng kerumeh aye buat nemuin Babe. Ah .. semoge aje Bang Ahmad bise ngambil hatinye Babe.

Dari ba’da Magrib aye dah rapih, dah wangi dan udeh mandi pastinye, nih malem aye pengen tampil cantik biar Bang Ahmad makin cinte ma aye dan makin mantep aje mo ngelamar aye. Nih malem aye pake baju biru kesayangan aye trus aye juge pake jilbab biru nyang tempo hari di beliin ame Bang Ahmad. Duh … aye jadi makin cantik aje.

“Fatimeeeeeeeh …. !!” suare Babe nyang super ngebas bikin aye kaget.

“Iye .. Be, bentar” Duh si Babe ngeganggu orang lagi dandan aje. Aye langsung buru-buru nyamperin Babe nyang lagi asik duduk di bawah pu’un sengon.

“Mane die dedemenan lo?, dah gini ari belom keliatan batang idungnye, jadi kagak die dateng kemari?!” Babe nyang lagi nyantai kaliatannye juga kagak sabar pingin liat calon mantunye. Hehhehe

“Jadi kok Be .. Bang Ahmad pasti jadi dateng” ati aye jadi deg-degan, aye kuatir Bang Ahmad kenape-kenape di jalan.

***

“Assalamualaikum … “ Nah .. ntu die Bang Ahmad dateng, aye langsung buru-buru kedepan bukain pintu bakal Bang Ahmad, sementare Babe buntutin aye dari belakang di ikutin ma Enyak.

“Waalaikumsalam … eh Abang,” aye rada manyun nemuin Bang Ahmad lantaran die telat 10 menit, aye protes ame Bang Ahmad soalnye kagak biase-biasenye die telat, setau aye Bang Ahmad ntu orang nyang tepat waktu kagak pernah ngaret sedikitpun, tapi nih malem tumben-tumbenan si Abang telat.

“Neng .. jangan manyun gitu dong ah, maap ye Abang rada telat soalnye tadi ada urusan bentar di tengah jalan. Eh iye nih, abang bawaain kerak telor ame lepet kesukaanye si Babe.” ah … si Abang nyoba ngerayu aye, tapi kagak tau ngapa aye paling kagak bisa dah marah ame Bang Ahmad.

Langsung aje aye nyuruh Bang Ahmad masuk, Babe ame Enyak dah nunggu di ruang tamu, sementara aye masuk ke dapur buat bikinin minum. Jantung aye dag dig dug aje dari tadi, aye takut kalo Babe bakal marahin Bang Ahmad lantaran die dah macarin anak gadisnye.

Saat aye balik ke ruang tamu sambil baawin minum ame nyuguhin kue nyang Bang Ahmad bawa, aye ngeliat Babe masih diem aja, die masih asik ame rokok kreteknye, dan Enyak sedari tadi sok-sokan basa basi ame si Bang Ahmad. Duh … aye jadi makin deg-degan aje, si Babe ngape jadi diem aje ye, pan die nyang nyuruh Bang Ahmad dateng kemari, aye jadi kesian ngeliat Bang Ahmad duduknye jadi gelisah gitu udah kayak orang sakit ambeyen.

“Di minum Bang tehnye” aye nyoba ncairin suasane, aye jadi bingun sendiri. Mata Babe ngeliatin Bang Ahmad mulu, hehhehe .. aye rase Babe juga terpanah ame ketampanan pacar aye, dan si Enayk dari tadi cume mesem-mesem aje.

“Iye .. Abang minum ye, Be .. tehnye aye minum ye?” Bang Ahmad mulai nyoba basa-basi ame Babe.

“Hhhmmm .. iye, minum dah” jawab Babe datar. Etdah si Babe dah kayak orang kesambet diem aje, biasenye juga die nyerocos aje.

“Name lo Ahmad?” tanye si Babe, hihiih … akhirnye Babe ngomong juga.

“Iye Be, name aye Ahmad” jawab si Abang dengan suarenye nyang lantang.

“Kate anak gue si Fatimeh, lo pacaran ame die? Dah berapa lame lo macarin anak gue?” Babe aye emang terkenal galak, ape lagi kalo die lagi beradepan ame orang yang lagi demen ame aye, ampun dah lagaknye si Babe jadi sok jaim gitu deh.

“Iye Be .. aye emang pacarnye fatimeh, aye juga dah lame demen ame die, sejak die Sanawiyah aye dah suka bener ma Fatimeh, cume waktu ntu aye belom berani ngutarain perasaan hati aye, nah pas Fatimeh lulus Aliyah baru deh aye berani bilang kalo aye cinte ame sayang ma die.” Kelar ngejawab pertanyaan si Babe, Bang Ahmad langsung natap aye. Aduuh … ternyate si Abang dari dulu dah suka juga ma ye. Bang Ahmad masih natap aye, sementara aye jadi senyum-senyum sambil malu-malu tapi mau.

“Denger ye … siape tadi name lo?”

“Ahmad .. Be”

“Iye … Ahmad, lo tau pan si Fatimeh ntu anak gue atu-atunye, lo tau juga pan kalo banyak perjaka nyang suka ame die, dari anak lurah ampe anak RT pernah pade nyoba dateng kemari bakal ngelamar Fatimeh. Dan lo tau kagak ? gue tau mereka siape tapi gue kagak mao sembarang nerime lamaran orang, ape lagi elo, gue lom tau elu siape, orang tue lo siape, kerjaan lo ape, haram ape kagak duit nyang lu punye?” begini nih Babe aye, kalo dah nyerocos dah kayak mercon.

Mendengar perkataan Babe, Bang Ahmad cume diem, tapi aye tau Bang Ahmad kagak bakal gentar kalo Cuma perkara Babe lom kenal ma die. Tapi jujur aje lantaran omongan Babe nyang kayak gitu aye jadi gak enak ati ma Bang Ahmad.

“Maap Be, mungkin aye udeh lancang, karena aye demen ame Fatimeh anak Babe, aye juga emang bukan anak-anak siape-siape, Babe aye bukan orang kelurahan atau pejabat lainye, kerjaan aye juga cume kayak gitu aje, aye bukan orang kantoran, tapi Inssayaallah bulan depan aye bakal ngajar di TPA, dan Alahamdulillah rejeki nyang aye dapetin halal, Insyaallah.” Ini nyang aye suka dari Bang Ahmad, pantang bagi die buat mundur,, meskipun Babe aye dah ngomong nyang rada nyinggung perasaannye tapi Bang Ahmad kagak kesel die tetep tenang ngadepin Babe aye nyang kalo ngomong emang suka asal goblek.

Sedari tadi Enyak aye cume diem aje nyimak Babe ame Bang Ahmad ngobrol, sementara aye juga tetep keliatan tenang meski ati aye ketar-ketir.

“Ahmad … kalo boleh Nyak tau siape name Babe lo?”

“Babe aye namenye Babe Jalum Nyak” jawab Bang Ahmad dengan di sertai senyum manisnye.

“Ape ???!!! ….. Jalum ? Jalum nyang punye toko kembang ntu? Jalum nyang tinggal di kampung rawa?” pertanyaan Babe dah kayak orang nyang lagi kaget, duh … ade ape lagi ye, jangan-jangan Babe dah kenal ame Babenye Bang Ahmad, tapi kok kayaknye reaksi Babe kayak kagak suka gitu ye.

“Iye … Babe jalum nyang tukang kembang ntu Babe aye, dan aye emang tinggal di kampung rawa. Jadi Babenye Fatimeh dah kenal ame Babe aye?” Bang Ahmad melemparkan senyumanye ke aye, keliatan banget kalo Bang Ahmad seneng.

“Iye … gue kenal ame Babe lo, dan lu kudu tau, Babe lu itu pernah ngerebut pacar gue, dan Babe lo ntu musuh bebuyutan gue dari dulu.”

Dulu Enyak emang pernah cerite ame aye soal kisah cintenye tempo dulu, ya … kagak jauh beda ame aye. Enyak dulunye adalah seorang gadis kampung nyang baik hati, dan cantik pula. Saat ntu ada due orang perjaka nyang naksir ame Enyak, trus akhirnye Enyak milih Babe buat di jadiin pacarnye, dan di tengah jalinan asmara Enyak ame Babe, muncul lah seorang perjaka lainye nyang berusaha untuk ngerebut Enyak dari Babe. Dan sekarang aye tau rupenye Babenye Bang Ahmad nyang pernah ngerejokin hubungan asmara Nyak ame Babe aye.

“Assalamualaikum … Be” sore ntu aye menghampiri Babe nyang lagi asik ame kebiasaanye di sore hari, yantu duduk di bawah pu’un sengon sambil di temenin rokok kterek ame kopi item kesukaanye.

“Waalaikumsalam … eh elu Fatimeh, dah pulang lu ?” aye duduk di samping Babe, sambil menemenin Babe menikmati hawa sejuk sore hari.

“Iye .. Be, aye pulang di anter ame Bang Ahmad, mangkenye gini hari aye dah nyampe rumeh” mendengar aye nyebut name Bang Ahmad, mukenye Babe langsung keliatan sepet.

Padahal ye, hubungan aye ma Bang Ahmad dah lame benget, kalo kagak saleh pas aye lulus Aliyah taun due ribu lime nyang lalu. Aye kenal ma Bang Ahmad lantaran aye di kenalin ame Nita temen ngaji aye di Ta’lim. Jujur aje nih, sebenernye aye juga dah naksir ame Bang Ahmad, eh … ujug ..ujug si Nita ngenalin aye ma Bang Ahmad, ya udeh aye seneng banget. Pas ntu rase-rasenye aye pingin terbang aje kaya kupu-kupu.

Waktu ntu yang aye tau Bang Ahmad adalah cowok kampung yang lumayan keren, klo di ajak kondangan juga kagak malu-maluin banget, biar kate orang kampung penampilan Bang Ahmad lumayan rapih, die selalu make kemeja ame celana bahan, jarang deh pokoknye aye ngeliat Bang Ahmad pake celana lepis, bukan karena si Abang kagak punya atau kagak mampu beli, tapi Bang Ahmad ngerasa kagak nyaman aje ame nyang namenye celana lepis.

“Eh … Fatimeh .. Babe mo nanya nih ye ame lu, tapi lu kudu jujur ame Babe!” Babe mematikan rokok kreteknye yang baru abis setengah batang, letak kopyahnya yang rada miring die betulin, keliatanye si Babe mo ngomong serius nih. Duh .. aye jadi deg-degan.

“Tanye ape Be?” aye makin penasaran, dan aye buru-buru ngatur napas, jaga-jaga takutnye si Babe nanya yang aneh-aneh terus asma aye kambuh pan berabe.

“Emangnye ape sih yang lu suka dari si Ahmad itu, die pan pengangguran dan nyang Babe tau die ntu cume marbot mushola. Lagian ye Fatimeh, ntu si Juki anaknye Haji Samsul juga naksir ame elu. Nah kalo elu ame die seratus persen Babe setuju.” Dengan santai Babe nyundut rokoknye lagi, malahan sekarang sambil kipas-kipas.

“Aduuhh .. Babe plis deh, masa dah gini hari masih ngejodohin anak aje, dah kagak jaman kali Be. Lagian ye Be, aye dah cinte mentok ame Bang Ahmad, aye kagak bakal berpaling ke cowok lain, cinte aye cume bakal Bang Ahmad seorang. Titik kagak pake koma.” aye buru-buru ngatur napas yang udah rada ngap-ngapan gara-gara ngedenger omongan Babe.

“Fatimeh .. Fatimeh .. ape sih yang elu arepin dari si Ahmad ntu, kerja kagak .. ape kagak. Emang si sholatnye rajin, tapi pan ntu doank kagak cukup Timeh” suara Babe yang rada ngebass bikin nyali aye ciut, duh aye jadi takut, mungkin klo ini pilem kartun di kepala Babe bakal muncul tanduk, hehheheh ….

“Ya .. ampun Be, jangan suka nilai orang dari materinye aje dong Be. Babe mau punya mantu yang kaya raya tapi agamenye keblangsak, trus sesat, kagak pernah sholat …. duh amit-amit deh Be aye si ogah.” napas aye mulai ngap-ngapan lagi, ah … untungnye Enyak dateng bawain air putih ma kue cucur.

Ah … ini lah jeleknye Babe aye, selalu ngeliat dari materi, mentang-mentang Bang Ahmad kagak punye mobil kayak si Juki, mentang-mentang Bang Ahmad kagak pernah pake dasi kayak si Juki, langsung aje deh si Babe ngecap Bang Ahmad kagak pantes buat aye. Babe kagak tau sih, kalo mobil yang suka di pamerin Juki ntu cuma mobil Bokapnye, dan kerjanya si Juki juga cuma luntang-lantung kagak jelas, soal perkara dasi yang suka Juki pake mah, ntuh cuma gegayaan die aje.

“Tau nih si Abang, dulu waktu Abang ngelamar aye, Abang juga lom kerja, lom punye ape-ape tapi lantaran Abang orangnye ulet, akhirnye aye mau ame Abang” Nyak ikutan nimbrung obrolan aye ma Babe, dan kayaknye Enyak setuju ma dedemenan aye si Bang Ahmad.

“Ah … ! rese lo Ti, nyamber aje kayak gledek.” spontan aje tampang Babe nyang tadinye serem sekarang mulai keliatan kalem, gara-gara omongan Enyak, Babe jadi rada malu ma aye.

“Be … Bang Ahmad ntu, kagak seburuk nyang Babe kira, diem-diem begitu Bang Ahmad juga punye kerjaan, nah lantaran Bang Ahmad orangye kagak sombong, mangkenye die kalem-kalem aje. Aye sediri aje baru tau tadi kalo sebenernye Bang Ahmad ntu punye penghasilan sendiri, dan yang kudu Nyak ame Babe tau, Bang Ahmad bakal ngelamar aye pake duit tabunganye sendiri. Hebat kan Be?”

Nyak ame Babe langsung adu pandang. Nyak melempar senyumanye ke aye, sementara Babe langsung nyeruput kopinye lagi ampe tandas.

“Fatimeh …. Kalo elu bener-bener dan mantep ame si Ahmad, lu bawa tu bocah kemari, Babe mo kenal dulu, Babe pingin tau ape kerjanye, Babe juga pingin tau asal usulnye tu bocah,” muke Babe yang tadi rada kecut sedikit berubah, ya .. meskipun masih kagak ada ekspresinye sama sekali.

“Jadi … Jadi Babe setuju aye kawin ma Bang Ahmad?”

“Siapa bilang Babe setuju, Babe Cuma mo tau dulu, ntu bocah orangnye gimane, kerjanye ape? Orang tuanye siape ?.” Dari pertama aye pacaran ma Bang Ahmad ampe sekarang Babe emang kagak pernah engeh ame tampang Bang Ahmad, ya .. maklum aje tiap Bang Ahmad ngapelin aye Babe selalu kagak mau nemuin, palingan cuma Enyak yang masih ade basa-basinye dikit.

“Iye deh Be, ntar aye kasih tau ke Bang Ahmad kalo Babe mau ketemu ma die. Makasih ye Be” dengan tampang yang senengnye bukan maen aye nyium tangan Babe ma Enyak.

***

“Assalamualaikum …. Bang Ahmad ye ?, ini aye bang Fatimeh”

“Waalaikumsalam … eh elu Timeh, tumben-tumbenan nelpon, kangen ye ma Abang?

“Yee .. si Abang, ke GeEran amat, ada kabar bagus Bang”

“Kabar ape Neng ?”

“Babe minte supaya Abang dateng kerumeh, Babe mo ketemu ame Abang”

“Yang bener Neng? Kapan?”

“Bener Abang sayang, kapan si aye pernah boong ame Abang. Malem minggu Bang, Ba’da Isya”

“Ok deh Neng, duh Abang jadi deg-degan gini ya”

“Bang udeh dulu ye .. koin aye dah abis neh. Dadaaah .. Abang. Salamlikum”

“Iye dah .. kumsalam”

Duh .. aye jadi kagak sabaran pingin buru-buru malem minggu, semoga aje Bang Ahmad bise ngambil Hatinye Babe. Amin.

Type your summary here“Neng pan kite dah lame kenal ye…, Abang juga dah cinte bener ma Eneng.Neng, gimana kalo Abang dateng kerumeh nemuin Nyak ame Babenye Eneng.”

“Hah …!! apaan Bang? Abang mo ngelamar aye ?”,
aye tekejut kaget juga denger omongan si Abang barusan, rasenye jantung aye ampe mo copot. O mai god orang Londo bilang, die mo ngelamar gue.

“Neng … neng … ye… si eneng malah melongo begitu, gimana ini?, Neng mau kagak kawin ma Abang?” si Abang ngegerakin dua tangannye di antara matanye ame mate aye.

Aye bener-bener gerogi. Di tengah getaran tangannye, aye paksain buat ngejawab spontan “Iye .. Bang aye mau, aye mau banget kawin ma Abang.” Walhasil si Abang loncat jungkir balik, jingkrak kegirangan. Kelakuanye udah mirip kaya orang kesurupan.

“Oke deh ..Neng, bulan depan Abang kerumeh ye, ngajak Enyak ame Babenye Abang buat ngelamar Eneng”. Aduh .. aduhh .. aye senengye setengah mati denger omongan si abang, berasa lagi mimpi aje.


******

Type rest of the post hereBesok paginye aye bangun pagi-pagi bener, aye kagak mo kalah ma ayam jagonya Kong Ubay yang tiap pagi bekokok. Celingak- celinguk aye nyelongok ke luar lewat jendela. Ah .. ternyate Matahari juga lom muncul. Nih pagi aye udeh bertekat bakal ngomong ame Babe soal rencana Bang Ahmad tempo hari.

Aye liat Babe masih asik ngebaca koran nih hari, sementara Enyak baru aje dateng dari dapur sambil bawa nampan yang isinye secangkir kopi. Rutinitas yang asik menurut aye. Koran ame kopi di pagi hari, Qur’an ame Qorie di malem hari. Ya .. begitu dah Nyak ma Babe aye, selalu kayak gitu dari dulu, Nyak ame Babe keliatanye akur mulu, jarang berantemnye.

“Nyak, Babe ade nyang mau aye sampein neh”. Babe nyeruput kopi dengan bibirnye yang udah rada keriput. Babe rada nurunin dikit lembar koranye, trus matenye ngelerik sedikit kea rah aye. Sementare enyak sendiri khusyu banget ame catetan belanjaanye. Sambil nunggu respon dari Babe aye duduk diem di pojokan dah kaya anak kucing kesiram aer.

“Mau ngomong apaan lu, serius amat tampang lu,” suare Babe yang rada ngebas bikin jantung aye mo lompat, duh … bikin aye kaget aje. Sementara mata Babe natap tajem kearah aye anak cantik kesayangannye. (bukanye aye narsis, tapi ini kenyataan .. hehhe )

Keliatanye Enyak ame Babe udah siap bener nyimak pembicaraan aye. “Gini Be, anu …. Emm .." duh gimane nih, susah bener mo nyampein kabar baik ini. Kabar yang aye anggep amat sangat nyenengin hati aye, tapi … kagak tau dah kalo menurut Nyak ame Babe. Karena ampe sekarang yang aye tau Babe masih kurang suka ame dedemenan aye.

“Anu … anu, anu apaan, kalau mau ngomongn yang bener Neng, jangan bikin Nyak ame Babe keblingsatan begini gara-gara penasaran ma omongan lu !.”

“Begini Nyak, Babe, tempo hari aye abis jalan ame Bang Ahmad. Trus Bang Ahmad bilang die mau ngelamar aye.” Aduh .. nih Jantung tiba-tiba dag dig dug, dah kayak bunyi beduk.

“Bang Ahmad minta supaya aye ngomongin masalah ini terlebih dahulu ke Babe, karena Insyaallah bulan depan orantuenye Bang Ahmad bakal kemari buat ngelamar aye.” Babe masih aja diem die langsung nyeruput sise kopinye ampe ludes. Sementara Enyak, cume senyam-senyum sambil ngeliatin aye, anak perawan atu-atunye. Aye tunggu jawaban Babe 1 detik, 2 detik …. 1menit, 2 menit …. Eetttt dah si Babe masih tetep diem aje.

Duh … !! ya udeh deh "Nyak, Babe .. aye berangkat kerja dulu ye.” Sekali lagi aye nengok ke Babe berharap supaya Babe mau ngesrpon omongan aye soal niat Bang Ahmad yang mau ngelamar aye. Tapi Nihil setelah aye nyium tangangnye, Babe tetep milih diem.

*****

“Gimana Neng, udah ngomong ame Babe tentang rencana Abang?” Bang Ahmad nanyain lagi soal ini Kayak-kayaknye Bang Ahmad bener-bener pingin ngelamar aye.

“Aye udah omongin semua ke Babe tentang rencana Abang, tapi Babe belom ngasih tanggapan Bang, Babe keliatan cuek aje.” Bang Ahmad cuma senyam-senyum. Tapi terus terang aye sendiri kagak ngerti ame maksud senyuman si Abang. Sejauh ini Bang Ahmad adalah laki-laki yang paling bae yang pernah aye kenal, die juga sangat sabar, sholat lime waktunye kagak pernah ketinggalan barang atupun.

“Bang, gimane kalo Babe kagak nerime lamaran Abang ?” Aye coba menanyakan kemungkinan buruk ini ke Bang Ahmad. Karena kayaknye Babe kurang suka ame Bang Ahmad lantaran sampe saat ini Bang Ahmad masih nganggur.

“Neng percayakan sama abang ?” Aye ngangguk jawab pertanyaan Bang Ahmad

“Nah .. kalau Neng udah bisa percaya ame Abang,
Insyaallah semuanye bakal lancar, Neng berdoa aje ye dan coba terus kasih keyakinan same Babe, kalau Abang bener-bener serius ame Eneng.”

"I Love you Abang". Aye lemparkan senyuman paling manis yang aye punye bakal Bang Ahmad tersayang. dan dalam hatipun aye pun bermunajat kepada-Nya.