ruang.celoteh.0211

“Assalamualaikum … Be” sore ntu aye menghampiri Babe nyang lagi asik ame kebiasaanye di sore hari, yantu duduk di bawah pu’un sengon sambil di temenin rokok kterek ame kopi item kesukaanye.

“Waalaikumsalam … eh elu Fatimeh, dah pulang lu ?” aye duduk di samping Babe, sambil menemenin Babe menikmati hawa sejuk sore hari.

“Iye .. Be, aye pulang di anter ame Bang Ahmad, mangkenye gini hari aye dah nyampe rumeh” mendengar aye nyebut name Bang Ahmad, mukenye Babe langsung keliatan sepet.

Padahal ye, hubungan aye ma Bang Ahmad dah lame benget, kalo kagak saleh pas aye lulus Aliyah taun due ribu lime nyang lalu. Aye kenal ma Bang Ahmad lantaran aye di kenalin ame Nita temen ngaji aye di Ta’lim. Jujur aje nih, sebenernye aye juga dah naksir ame Bang Ahmad, eh … ujug ..ujug si Nita ngenalin aye ma Bang Ahmad, ya udeh aye seneng banget. Pas ntu rase-rasenye aye pingin terbang aje kaya kupu-kupu.

Waktu ntu yang aye tau Bang Ahmad adalah cowok kampung yang lumayan keren, klo di ajak kondangan juga kagak malu-maluin banget, biar kate orang kampung penampilan Bang Ahmad lumayan rapih, die selalu make kemeja ame celana bahan, jarang deh pokoknye aye ngeliat Bang Ahmad pake celana lepis, bukan karena si Abang kagak punya atau kagak mampu beli, tapi Bang Ahmad ngerasa kagak nyaman aje ame nyang namenye celana lepis.

“Eh … Fatimeh .. Babe mo nanya nih ye ame lu, tapi lu kudu jujur ame Babe!” Babe mematikan rokok kreteknye yang baru abis setengah batang, letak kopyahnya yang rada miring die betulin, keliatanye si Babe mo ngomong serius nih. Duh .. aye jadi deg-degan.

“Tanye ape Be?” aye makin penasaran, dan aye buru-buru ngatur napas, jaga-jaga takutnye si Babe nanya yang aneh-aneh terus asma aye kambuh pan berabe.

“Emangnye ape sih yang lu suka dari si Ahmad itu, die pan pengangguran dan nyang Babe tau die ntu cume marbot mushola. Lagian ye Fatimeh, ntu si Juki anaknye Haji Samsul juga naksir ame elu. Nah kalo elu ame die seratus persen Babe setuju.” Dengan santai Babe nyundut rokoknye lagi, malahan sekarang sambil kipas-kipas.

“Aduuhh .. Babe plis deh, masa dah gini hari masih ngejodohin anak aje, dah kagak jaman kali Be. Lagian ye Be, aye dah cinte mentok ame Bang Ahmad, aye kagak bakal berpaling ke cowok lain, cinte aye cume bakal Bang Ahmad seorang. Titik kagak pake koma.” aye buru-buru ngatur napas yang udah rada ngap-ngapan gara-gara ngedenger omongan Babe.

“Fatimeh .. Fatimeh .. ape sih yang elu arepin dari si Ahmad ntu, kerja kagak .. ape kagak. Emang si sholatnye rajin, tapi pan ntu doank kagak cukup Timeh” suara Babe yang rada ngebass bikin nyali aye ciut, duh aye jadi takut, mungkin klo ini pilem kartun di kepala Babe bakal muncul tanduk, hehheheh ….

“Ya .. ampun Be, jangan suka nilai orang dari materinye aje dong Be. Babe mau punya mantu yang kaya raya tapi agamenye keblangsak, trus sesat, kagak pernah sholat …. duh amit-amit deh Be aye si ogah.” napas aye mulai ngap-ngapan lagi, ah … untungnye Enyak dateng bawain air putih ma kue cucur.

Ah … ini lah jeleknye Babe aye, selalu ngeliat dari materi, mentang-mentang Bang Ahmad kagak punye mobil kayak si Juki, mentang-mentang Bang Ahmad kagak pernah pake dasi kayak si Juki, langsung aje deh si Babe ngecap Bang Ahmad kagak pantes buat aye. Babe kagak tau sih, kalo mobil yang suka di pamerin Juki ntu cuma mobil Bokapnye, dan kerjanya si Juki juga cuma luntang-lantung kagak jelas, soal perkara dasi yang suka Juki pake mah, ntuh cuma gegayaan die aje.

“Tau nih si Abang, dulu waktu Abang ngelamar aye, Abang juga lom kerja, lom punye ape-ape tapi lantaran Abang orangnye ulet, akhirnye aye mau ame Abang” Nyak ikutan nimbrung obrolan aye ma Babe, dan kayaknye Enyak setuju ma dedemenan aye si Bang Ahmad.

“Ah … ! rese lo Ti, nyamber aje kayak gledek.” spontan aje tampang Babe nyang tadinye serem sekarang mulai keliatan kalem, gara-gara omongan Enyak, Babe jadi rada malu ma aye.

“Be … Bang Ahmad ntu, kagak seburuk nyang Babe kira, diem-diem begitu Bang Ahmad juga punye kerjaan, nah lantaran Bang Ahmad orangye kagak sombong, mangkenye die kalem-kalem aje. Aye sediri aje baru tau tadi kalo sebenernye Bang Ahmad ntu punye penghasilan sendiri, dan yang kudu Nyak ame Babe tau, Bang Ahmad bakal ngelamar aye pake duit tabunganye sendiri. Hebat kan Be?”

Nyak ame Babe langsung adu pandang. Nyak melempar senyumanye ke aye, sementara Babe langsung nyeruput kopinye lagi ampe tandas.

“Fatimeh …. Kalo elu bener-bener dan mantep ame si Ahmad, lu bawa tu bocah kemari, Babe mo kenal dulu, Babe pingin tau ape kerjanye, Babe juga pingin tau asal usulnye tu bocah,” muke Babe yang tadi rada kecut sedikit berubah, ya .. meskipun masih kagak ada ekspresinye sama sekali.

“Jadi … Jadi Babe setuju aye kawin ma Bang Ahmad?”

“Siapa bilang Babe setuju, Babe Cuma mo tau dulu, ntu bocah orangnye gimane, kerjanye ape? Orang tuanye siape ?.” Dari pertama aye pacaran ma Bang Ahmad ampe sekarang Babe emang kagak pernah engeh ame tampang Bang Ahmad, ya .. maklum aje tiap Bang Ahmad ngapelin aye Babe selalu kagak mau nemuin, palingan cuma Enyak yang masih ade basa-basinye dikit.

“Iye deh Be, ntar aye kasih tau ke Bang Ahmad kalo Babe mau ketemu ma die. Makasih ye Be” dengan tampang yang senengnye bukan maen aye nyium tangan Babe ma Enyak.

***

“Assalamualaikum …. Bang Ahmad ye ?, ini aye bang Fatimeh”

“Waalaikumsalam … eh elu Timeh, tumben-tumbenan nelpon, kangen ye ma Abang?

“Yee .. si Abang, ke GeEran amat, ada kabar bagus Bang”

“Kabar ape Neng ?”

“Babe minte supaya Abang dateng kerumeh, Babe mo ketemu ame Abang”

“Yang bener Neng? Kapan?”

“Bener Abang sayang, kapan si aye pernah boong ame Abang. Malem minggu Bang, Ba’da Isya”

“Ok deh Neng, duh Abang jadi deg-degan gini ya”

“Bang udeh dulu ye .. koin aye dah abis neh. Dadaaah .. Abang. Salamlikum”

“Iye dah .. kumsalam”

Duh .. aye jadi kagak sabaran pingin buru-buru malem minggu, semoga aje Bang Ahmad bise ngambil Hatinye Babe. Amin.